– Me har bygd ei maskin som kan analysera data frå ulike eksperiment samtidig. Før har kvart instrument sete på tua si – no blir me eit fellesskapsprosjekt der alle jobbar saman, seier Hans Kristian Kamfjord Eriksen, professor ved Institutt for teoretisk astrofysikk og leiar av det internasjonale forskingsprosjektet BeyondPLANCK.
Metoden Eriksen og kollegaene har vore med på å utvikla, har allereie forbetra biletet av The Big Bang.
No står analysemetoden klar når nye måleinstrument om nokre år klarer å oppdaga gravitasjonsstrålar frå The Big Bang og dermed gi oss meir detaljerte bilete av kva som faktisk skjedde under det store smellet for 13,8 milliardar år sidan.