I dag formiddag, litt etter klokka 11 norsk tid, kom beskjeden om at status for oppskytinga av NASAs Orbiting Carbon Observatory (OCO) var uviss. Satellitten vart skoten opp kl. 10:55 frå Vandenberg Air Force Base i California ombord ein Taurus XL-rakett. Dei første minutta av oppskytinga fungerte tilsynelatande alt som planlagt. Men mot slutten av det fjerde trinnet til raketten, vart det rapportert inn eit problem. Då var raketten allereie utanfor rekkjevidd for kameraa som blir brukte til å følgja med på oppskytinga.
Det ser ut til at topplokket på raketten, som vernar satellitten, ikkje har vorte skote vekk ordentleg, slik at separasjonen til satellitten frå raketten ikkje har gått som planlagt. OCO-satellitten skulle eigentleg plasserast i ein sirkulær, nær-polar bane i ei høgd av 705 kilometer over jordoverflata. Prosjektet har kosta 273 millionar dollar.
Prosjektteamet hos NASA jobbar no på spreng for å finna ut kva som skjedde og korleis tilstanden til satellitten er no. Det var den åttande oppskytinga der det vart brukt ein rakett av typen Taurus XL, og andre gongen ei slik oppskyting har feila. Det var første gongen NASA brukte ein slik rakett. Det er likevel relativt sjeldan at satellittoppskytingar feilar. Det blir skote i gjennomsnitt opp 200 satellittar per år.
OCO skulle ha studert naturleg og menneskeskapt karbondioksid-utslepp og -absorpsjon i håp om å finna ut meir om korleis karbondioksid bidreg til global oppvarming. Eit av hovudmåla til satellitten var å finna ut kvar det blir av karbondioksidet som forsvinn frå atmosfæren.
Oppdatering (25.02.2009):
Raketten med satellitten framleis ombord kom seg aldri ut i bane rundt jorda, men fall ned i havet utanfor Antarktis.
Foto: NASA/JPL