Chang'e-1 vart skoten opp 24. oktober 2007 av den kinesiske romorganisasjonen Chinese National Space Administration (CNSA). Satellitten er Kinas første ekspedisjon til månen, og er ein del av det kinesiske målet om å landa på månen med robot-utforskarar innan 2020.
Chang'e-1 hadde fire hovudmål; laga tre-dimensjonale kart av overflata, måla den kjemiske samansetninga på overflata, måla djupna av jordlaget på overflata og utforska romvêret mellom jorda og månen. I tillegg kom den planlagde kollisjonen med overflata, som skulle gi nyttig erfaring og kunnskap som kan brukast når Kina i framtida skal landa sondar på månen.
Den andre fasen i Kinas måneprogram blir å landa ein rover på måneoverflata rundt 2012. Den tredje fasen inneber også å senda ein rover til overflata, men denne gongen er planen at det også skal sendast mineral-prøver tilbake til jorda. Denne fasen er planlagd til 2017.
Kina har dei siste åra satsa tungt på romfart. Landet er det tredje, etter USA og Russland, som har sendt opp bemanna ferder. I 2003 sende dei opp sin første astronaut, Yang Liwei, som i september 2008 vart etterfølgd av tre astronautar til ombord Shenzhou-7.