Forskarane klarte å registrera spekteret av ein stor eksoplanet som går i bane rundt den lyssterke og svært unge stjerna HR 8799. Systemet ligg om lag 130 lysår frå Jorda. Stjernen har ein masse 1,5 gonger større enn Solas, og eit planetsystem som liknar ei forstørra utgåve av vårt eige solsystem.
Tre svære gassplanetar vart oppdaga av eit anna team i 2008; desse var mellom 7 og 10 gonger meir massive enn vår eiga gasskjempe, Jupiter. Dei tre planetane er mellom 20 og 70 gonger lenger unna moderstjerna enn Jorda er frå Sola. Systemet består også av to belte med mindre objekt, analogt til asteroidebeltet og Kuiperbeltet i vårt eige solsystem.
![svart bilete med gul sirkel i midten](/astro/forskning/aktuelt/aktuelle-saker/astronytt/2010/images/exoplanetspectrum_eso2.jpg)
Dette er altså første gong ein har klart å direkte observera spekteret av ein eksoplanet rundt ein vanleg, meir eller mindre solliknande stjerne. Inntil no har spektera vorte tekne vha. romteleskop, og ein spesiell teknikk der ein først tek spekteret av stjerna medan planeten er skjult bak han, for så å ta spekteret av stjerna og planeten saman. Differansen mellom desse to gir då spekteret til planeten.
Denne metoden kan likevel berre nyttast viss planetbanen er orientert på ein heilt spesiell måte, noko som er tilfelle for berre ein liten del av alle eksoplanetsystem. Det nye spekteret, derimot, vart teke frå bakken med ESOs Very Large Telescope (VLT) og observasjonane av planeten vart gjord direkte, utan å vera avhengig av ei spesiell baneorientering i forhold til moderstjerna.